ಕಂಪ್ಯೂಟರ್‌ನಲ್ಲಿ ಹಲವು ಸ್ತರಗಳ ತಂತ್ರಾಂಶಗಳು ಕಾರ್ಯನಿರ್ವಹಿಸುತ್ತವೆ. ಕನ್ನಡ ಬಳಕೆ ಸಮಸ್ಯೆಗಳ ಮೂಲವನ್ನು ತಿಳಿದುಕೊಳ್ಳಲು ಎಲ್ಲ ಸ್ತರಗಳ ತಂತ್ರಾಂಶಗಳನ್ನು ಗಮನಿಸಬೇಕು. ಕಂಪ್ಯೂಟರ್‌ನ ಮೊದಲ ಸ್ತರದ ತಂತ್ರಾಂಶವಾಗಿ ’ ಕಾರ್ಯಾಚರಣೆ ವ್ಯವಸ್ಥೆ ’ ( ಓ.ಎಸ್.) ಇದೆ. ಎರಡನೆಯ ಸ್ತರವಾಗಿ ’ ಆನ್ವಯಿಕ ತಂತ್ರಾಂಶ ’ ( ಆಪ್ಲಿಕೇಷನ್ಸ್) ಇದೆ. ಮೂರನೆಯ ಸ್ತರವಾಗಿ ’ ಕನ್ನಡ ಲಿಪಿ ತಂತ್ರಾಂಶ ’ ಗಳನ್ನು (ಫಾಂಟ್ ಅಥವಾ ಸ್ಕ್ರಿಪ್ಟ್ ಸಾಫ್ಟ್‌ವೇರ್) ಅಳವಡಿಸಿಕೊಂಡು ಬಳಸಲಾಗುತ್ತಿದೆ. ಕನ್ನಡ ಲಿಪಿವ್ಯವಸ್ಥೆಯನ್ನು ಕುರಿತಂತೆ ಇರುವ ಲಿಪಿತಂತ್ರಜ್ಞಾನವನ್ನು ಆಯಾ ಕಾಲಘಟ್ಟದ ಕಂಪ್ಯೂಟರ್ ತಂತ್ರಜ್ಞಾನಗಳ ಹಿನ್ನೆಲೆಯಲ್ಲಿ ಪ್ರಮುಖವಾಗಿ ನಾಲ್ಕು ತಲೆಮಾರುಗಳನ್ನಾಗಿ ವಿಂಗಡಿಸಬಹುದು. ಕಾಲಾನುಕ್ರಮದಲ್ಲಿ ಆವಿಷ್ಕಾರಗೊಂಡು ಬಳಕೆಗೆ ಬಂದ ವಿವಿಧ ಕಾರ್ಯಾಚರಣೆ ವ್ಯವಸ್ಥೆಗಳು ಮತ್ತು ಅವುಗಳ ಮೇಲೆ ಕಾರ್ಯನಿರ್ವಹಿಸುವ ಆನ್ವಯಿಕ ತಂತ್ರಾಂಶಗಳಲ್ಲಿನ ಕನ್ನಡ ಲಿಪಿವ್ಯವಸ್ಥೆಗಳ ಉಗಮ ಮತ್ತು ವಿಕಾಸಗಳ ಕುರಿತಾದ ಇತಿಹಾಸವನ್ನು ಗಮನಿಸಿದರೆ ಕನ್ನಡ ಭಾಷಾ ಬಳಕೆಯ ಸಮಸ್ಯೆಗಳು ಮತ್ತು ಪರಿಹಾರಗಳ ಇತಿಹಾಸವೂ ನಮಗೆ ತಿಳಿದುಬರುತ್ತದೆ. ಕನ್ನಡದ ಪ್ರತ್ಯೇಕ ಎಡಿಟರ್‌ಗಳಲ್ಲಿ ; ಓ.ಎಸ್. ಮೇಲೆ ಕಾರ್ಯನಿರ್ವಹಿಸುವ ಆನ್ವಯಿಕ ತಂತ್ರಾಂಶಗಳಲ್ಲಿ ಕನ್ನಡದ ಲಿಪಿವ್ಯವಸ್ಥೆಯನ್...