ಇಂದಿನ ಯುಗ ಎಲೆಕ್ಟ್ರಾನಿಕ್ ಯುಗ. ಬದುಕಿನ ಎಲ್ಲ ಕ್ಷೇತ್ರಗಳು ಎಲೆಕ್ಟ್ರಾನಿಕ್‌ಮಯ, ಡಿಜಿಟಲ್‌ಮಯವಾಗಿದೆ. ಇಂದು ‘ಮಾಹಿತಿ ಮತ್ತು ಸಂವಹನ ತಂತ್ರಜ್ಞಾನ’ ಎಂದು ಕರೆಯಲಾಗುವ
ಬುದ್ಧಿವಂತರ ಉದ್ಯಮದಲ್ಲಿ ಕೋಟ್ಯಂತರ ರೂಪಾಯಿಗಳ ವಹಿವಾಟಿದೆ. ಈಗ ಕಂಪ್ಯೂಟರುಗಳು
ಹಳೆಯದಾಗಿಹೋಗಿವೆ. ಜನಸಾಮಾನ್ಯರ
ನಿತ್ಯಜೀವನದಲ್ಲಿ ಈ ಸ್ಮಾರ್ಟ್‌ಫೋನ್ ಎಂಬ ಪುಟ್ಟ ಗ್ಯಾಜೆಟ್ ತನ್ನ ಇಡೀ ಜಗತ್ತಿನ ‘ವಿಶ್ವರೂಪದರ್ಶನ’ವನ್ನೇ ಮಾಡಿಸಿದೆ. ತಂತ್ರಜ್ಞಾನ ಸೀಮಿತ
ಸೌಲಭ್ಯಗಳ ಕಾರಣ ಎಲೆಕ್ಟ್ರಾನಿಕ್ ಸಾಧನಗಳಲ್ಲಿ ಭಾಷೆಗಳ ಲಿಪಿಯನ್ನು ಬಳಸುವುದು ಕಷ್ಟಕರ ಎಂಬ
ಅಭಿಪ್ರಾಯಗಳು ಇತ್ತು. ಇಂದಿನ ಆಧುನಿಕ ತಂತ್ರಜ್ಞಾನದ ಸಂದರ್ಭದಲ್ಲಿ ಕಂಪ್ಯೂಟರ್, ಸ್ಮಾರ್ಟ್‌ಫೋನು, ಐ-ಪ್ಯಾಡ್ ಇತ್ಯಾದಿ ಎಲೆಕ್ಟ್ರಾನಿಕ್
ಸಾಧನಗಳಲ್ಲಿ ನಮ್ಮ ಭಾಷೆಯನ್ನು ಉಳಿಸಿ ಬೆಳೆಸುವುದು ಇಂದು ಒಂದು ಸವಾಲಾಗಿ ಉಳಿದಿಲ್ಲ. ಇಂಗ್ಲಿಷ್‌ನಷ್ಟೇ
ಸಮರ್ಥವಾಗಿ ಇಂದು ಕನ್ನಡವೂ ಸೇರಿದಂತೆ ಭಾರತೀಯ ಭಾಷೆಗಳನ್ನು ಸುಲಭವಾಗಿ ಬಳಸಬಹುದು.
ಅಷ್ಟರಮಟ್ಟಿಗೆ ತಂತ್ರಜ್ಞಾನ ಸೌಲಭ್ಯಗಳಿವೆ. ಆದರೆ, ಈ ಕುರಿತು
ಹೆಚ್ಚಿನವರಿಗೆ ಮಾಹಿತಿಯಿಲ್ಲ. ಗ್ಯಾಜೆಟ್‌ಗಳು ನಮ್ಮೊಂದಿಗೆ ಮಾತನಾಡುತ್ತವೆ. ಅವುಗಳ ಭಾಷೆ ಕೇವಲ
ಇಂಗ್ಲಿಷ್ ಎಂಬುದು ನಮ್ಮ ಭ್ರಮೆಯಾಗಿದೆ. ಕೆಲವೊಂದು ನಿಗದಿಗಳನ್ನು (ಸೆಟ್ಟಿಂಗ್ಸ್)
ಮಾಡಿಕೊಳ್ಳುವ ಮೂಲಕ. ಸ್ಮಾರ್ಟ್‌ಫೋನುಗಳು ಬಳಕೆದಾರರೊಂದಿಗೆ ಕನ್ನಡದಲ್ಲಿಯೂ ವ್ಯವಹರಿಸುವಂತೆ ಮಾಡಬಹುದು, ಇದೇ ಕನ್ನಡದ ‘ಯೂಸರ್ ಇಂಟರ್‌ಫೇಸ್’. ಇನ್ನು ಕನ್ನಡ ಲಿಪಿಯನ್ನು ಸುಲಭವಾಗಿ ಬಳಸಲು ಎಲೆಕ್ಟ್ರಾನಿಕ್ ಸಾಧನಗಳಲ್ಲಿ ಕೆಲವು
ನಿಗದಿಗಳನ್ನು ಮಾಡಿಕೊಂಡು, ಕೆಲವು ಆಪ್‌ಗಳನ್ನು ಅಳವಡಿಸಿಕೊಳ್ಳುವ ಮೂಲಕ, ಕಿರುಸಂದೇಶಗಳನ್ನು
(ಎಸ್ಸೆಮ್ಮೆಸ್ಸು) ಮತ್ತು ವಿದ್ಯುನ್ಮಾನ
ಅಂಚೆಯನ್ನು (ಇ-ಮೇಯ್ಲ್) ಕನ್ನಡದಲ್ಲಿಯೇ ಕಳುಹಿಸಬಹುದು. ಅದಕ್ಕಾಗಿ ಲಭ್ಯವಿರುವ ಸೌಕರ್ಯಗಳು
ಏನೇನು, ಅವನ್ನು ಹೇಗೆ ಅಳವಡಿಸಿಕೊಳ್ಳುವುದು, ಬಳಸುವುದು ಹೇಗೆ, ಸಮಸ್ಯೆಗಳಿದ್ದರೆ ಸರಿಪಡಿಸಿಕೊಳ್ಳುವುದು
ಹೇಗೆ ಎಂಬುದನ್ನು ತಿಳಿದು ಕಲಿಯುವುದೇ ‘ಡಿಜಿಟಲ್ ಕನ್ನಡ ಕಲಿಕೆ’.
ಕಂಪ್ಯೂಟರ್‌ನಲ್ಲಿ ಕನ್ನಡ ಟೈಪ್‌ಮಾಡಲು ಸುಲಭವಾದ ಕೀಲಿಮಣೆ ವಿನ್ಯಾಸ ಬಂದು
ದಶಕಗಳೇ ಆದರೂ, ಹೆಚ್ಚಿನವರಿಗೆ ಅದರ ಅರಿವಿಲ್ಲ. ಕೈಬೆರಳಲ್ಲಿ
ಕನ್ನಡಲಿಪಿಯನ್ನು ಬೆರೆಯುವ ಸೌಲಭ್ಯ ಬಂದು ವರ್ಷಗಳಾದರೂ, ಅದರ
ಅರಿವಿಲ್ಲದೆ, ಮೊಬೈಲ್ ಬಟನ್‌ಗಳನ್ನು ಒತ್ತಿ ಕನ್ನಡ ಮೂಡಿಸುವ
ತಾಳ್ಮೆಯಿಲ್ಲದೆ, ಸ್ಮಾರ್ಟ್ ಫೋನುಗಳಲ್ಲಿ ಇಂದಿಗೂ ಇಂಗ್ಲಿಷ್‌ಲಿಪಿಯಲ್ಲಿಯೇ
ಕನ್ನಡ ಭಾಷೆಯನ್ನು ಬಳಸಲಾಗುತ್ತಿದೆ.
ಈಗ
ನಾವೆಲ್ಲರೂ ಕನ್ನಡವನ್ನು ಕಲಿತಿಲ್ಲ ಎನ್ನುವಂತಿಲ್ಲ, ಆದರೆ, ಈಗ ಡಿಜಿಟಲ್ ಕನ್ನಡವನ್ನು, ಅಂದರೆ, ವಿದ್ಯುನ್ಮಾನ ಕನ್ನಡವನ್ನು (ಎಲೆಕ್ಟ್ರಾನಿಕ್ ಕನ್ನಡ) ಕಲಿಯುವ ಅನಿವಾರ್ಯತೆ ಇದೆ.
ಎಲೆಕ್ಟ್ರಾನಿಕ್ ಗ್ಯಾಜೆಟ್‌ಗಳನ್ನು ಬಳಸುವುದನ್ನು ಕಲಿಯಲು ಚಿತ್ರರೂಪಿ ಐಕಾನ್‌ಗಳ ಜೊತೆಗೆ
ಇಂಗ್ಲಿಷ್ ಇಂಟರ್‌ಫೇಸ್ ಸಾಮಾನ್ಯವಾಗಿ ಬಳಕೆಯಲ್ಲಿದೆ. ಈ ಇಂಟರ್‌ಫೇಸ್‌ನ್ನು ಕನ್ನಡಕ್ಕೆ
ಬದಲಿಸಿಕೊಳ್ಳಬಹುದಾದರೂ, ಸಾಮಾನ್ಯವಾಗಿ ಶಿಕ್ಷಿತ ಸಮುದಾಯವು ಇದನ್ನು
ಮಾಡಿಕೊಳ್ಳುವುದಿಲ್ಲ. ಏಕೆಂದರೆ, ಅವರಿಗೆ ಇಂಟರ್‌ಫೇಸ್‌ನ ಭಾಷೆ ಮುಖ್ಯವಾಗುವುದಿಲ್ಲ. ಇನ್ನು ಬಳಕೆಯ ಭಾಷೆಯಾಗಿ
ಕನ್ನಡವನ್ನು ಅಳವಡಿಸಿಕೊಳ್ಳಲು ಹೆಚ್ಚಿನವರಿಗೆ ತಿಳಿವಳಿಕೆಯಿಲ್ಲ. ಇದ್ದರೂ, ಕೆಲವೊಂದು ಸಮಸ್ಯೆಗಳಲ್ಲಿ ಸಿಲುಕಿದರೆ ಬಳಕೆ ಸುಲಭವಾಗುವುದಿಲ್ಲ. ಸ್ಮಾರ್ಟ್‌ಫೋನುಗಳಲ್ಲಿ
ಕನ್ನಡವನ್ನು ಕನ್ನಡ ಲಿಪಿಯಲ್ಲಿಯೇ ಬರೆದರೆ ಓದಲು ಚೆನ್ನ ಮತ್ತು ಸುಲಭವೂ ಹೌದು. ಆದರೆ, ಕನ್ನಡವನ್ನು ಇಂಗ್ಲಿಷ್ ಲಿಪಿಯಲ್ಲಿ ಬರೆದರೆ ಅದನ್ನು ಓದುವ ಸಂಕಟ ಯಾರಿಗೂ ಬೇಡ.
ತುಳುವನ್ನು ಕನ್ನಡ ಲಿಪಿಯಲ್ಲಿ ಬರೆಯುವುದು ವಾಡಿಕೆ. ಹೆಚ್ಚಿನವರಿಗೆ, ಕನ್ನಡ
ಲಿಪಿ ಬಳಕೆಯ ಅರಿವಿನ ಕೊರತೆಯಿಂದ ಈಗ ಸ್ಮಾರ್ಟ್‌ಫೋನುಗಳಲ್ಲಿನ ತುಳು ಸಹ ಕನ್ನಡಲಿಪಿ ಬದಲಿಗೆ
ಇಂಗ್ಲಿಷ್‌ಗೆ ಬದಲಾಗಿದೆ.
ಜನಸಾಮಾನ್ಯರೂ
ಸಹ ತಮ್ಮ ಎಲೆಕ್ಟ್ರಾನಿಕ್ ಗ್ಯಾಜೆಟ್‌ಗಳಲ್ಲಿ ಕನ್ನಡವನ್ನು ಸುಲಭವಾಗಿ ಬಳಸುವಂತಾಗಲು ಒಂದಷ್ಟು
ಟಿಪ್ಸ್, ತಂತ್ರಗಳು ಸೇರಿದಂತೆ ಮಾಹಿತಿಯನ್ನು ಒದಗಿಸುವುದು ‘ಡಿಜಿಟಲ್ ಕನ್ನಡ’ ಅಂಕಣದ ಉದ್ದೇಶ.
ಕಾಮೆಂಟ್‌ಗಳು
ಕಾಮೆಂಟ್‌ ಪೋಸ್ಟ್‌ ಮಾಡಿ